लेख विवरण

खेलकुद डेस्क, अर्जेन्टिनाको एक फुटबल खेलका क्रममा खेलाडीले रेफ्रीमाथि साङ्घातिक आक्रमण गरेपछि खेल जगत स्तब्ध बनेको छ। खेलका क्रममा विवाद उत्पन्न भएपछि एक खेलाडीले रेफ्रीलाई मुक्का प्रहार गरी मैदानमै बेहोस बनाइदिएका छन्।

अर्जेन्टिनाको क्षेत्रीय लिग अन्तर्गतको खेलमा यो दुखद घटना भएको हो। खेलका क्रममा रेफ्रीले एक खेलाडीलाई अनुशासन पालना नगरेको भन्दै रातो कार्ड देखाएपछि विवाद सुरु भएको थियो। कार्डबाट आक्रोशित बनेका ती खेलाडीले रेफ्रीको अनुहारमा शक्तिशाली मुक्का प्रहार गरेका थिए। मुक्का लागेलगत्तै रेफ्री सन्तुलन गुमाएर भुइँमा ढलेका थिए र केही समयका लागि अचेत भएका थिए।

रेफ्री मैदानमा ढलेपछि मेडिकल टोली तत्कालै मैदानमा प्रवेश गरी उनलाई प्राथमिक उपचार दिएको थियो। अवस्था गम्भीर देखिएपछि उनलाई थप उपचारका लागि नजिकैको अस्पताल लगिएको छ। यस हिंस्रक घटनापछि खेललाई तत्कालै रद्द गरिएको थियो।

आक्रमण गर्ने खेलाडीलाई तत्कालै प्रहरीले नियन्त्रणमा लिएको छ। स्थानीय फुटबल संघले ती खेलाडीमाथि आजीवन प्रतिबन्ध लगाउन सक्ने संकेत गरेको छ। खेल अधिकारीहरूले यस घटनालाई 'फुटबलको कालो दिन' भन्दै भत्र्सना गरेका छन्। रेफ्रीको सुरक्षालाई लिएर अहिले अर्जेन्टिनाको फुटबल वृत्तमा ठूलो बहस सुरु भएको छ।

फुटबल मैदानमा हुने यस्ता हिंसात्मक गतिविधिले खेलको गरिमालाई धुमिल बनाएको भन्दै सामाजिक सञ्जालमा समेत कडा आलोचना भइरहेको छ।