राष्ट्रिय विभूति पासाङ ल्हामुको स्मृतिमा दौड प्रतियोगिता आयोजना हुँदै
काठमाडौँ । प्रथम नेपाली महिला सगरमाथा आरोही पासाङ ल्हामु शेर्पाको ३३औँ स्मृति दिवसलाई विशेष बनाउन राजधानीमा दौड प्रतियोगिता आयोजना गरिने भएको छ। पासाङ ल्हामु पर्वतारोहण प्रतिष्ठानले मेल्टडाउन रन क्लबसँगको सहकार्यमा यस प्रतियोगिताको तयारी पूरा गरेको हो।
प्रतिष्ठानका अनुसार यो दौड नक्सालस्थित नारायणचौरबाट सुरु हुनेछ। सहभागीहरूको सहजता र रुचि अनुसार प्रतियोगितालाई दुई विधामा विभाजन गरिएको छ— ३ किलोमिटर र ५ किलोमिटर। नेपाली महिलाले सगरमाथाको शिखरमा पहिलो पटक पाइला टेकेको गौरवपूर्ण दिनको स्मरणमा यो कार्यक्रम तय गरिएको आयोजकले बताएका छन्।
आजभन्दा ३३ वर्षअघि अर्थात् २०५० साल वैशाख १० गते पासाङ ल्हामु शेर्पाले विश्वको सर्वोच्च शिखर सगरमाथाको सफल आरोहण गरेकी थिइन्। तर, शिखरबाट फर्कने क्रममा उनको दुःखद निधन भएको थियो। सोही ऐतिहासिक उपलब्धिलाई सम्मान गर्दै हरेक वर्ष वैशाख १० गते विभिन्न कार्यक्रमका साथ पासाङ स्मृति दिवस मनाउने गरिन्छ।
प्रतियोगिताको तयारीबारे जानकारी दिँदै प्रतिष्ठानकी उपाध्यक्ष लाक्पा फुटी शेर्पाले यस पटक दौडमार्फत स्मृति दिवस मनाउन लागिएको बताउनुभयो। उहाँका अनुसार यो प्रतियोगिता केवल दौड मात्र नभई एउटा परोपकारी कार्य पनि हो। "प्रतियोगिताबाट सङ्कलित हुने सम्पूर्ण रकम प्रतिष्ठानले विभिन्न सामाजिक सेवाका गतिविधिमा खर्च गर्ने योजना बनाएको छ," शेर्पाले जानकारी दिनुभयो।
नेपालको पर्वतारोहण इतिहासमा महिला साहसको प्रतीक बनेकी पासाङ ल्हामुको योगदानलाई नयाँ पुस्तासम्म पुर्याउन यस्ता खेलकुद गतिविधिले मद्दत पुग्ने विश्वास आयोजकको छ।
टिप्पणी लेख्नुहोस्