लेख विवरण

काठमाडौँ । आइसिसी पुरुष विश्वकप लिग-२ अन्तर्गत त्रिकोणात्मक सिरिजको १००औँ खेलमा आज (शुक्रबार) घरेलु टोली नेपाल र संयुक्त अरब इमिरेट्स (युएई) बीच प्रतिस्पर्धा हुँदैछ। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने यो खेल दुवै टोलीका लागि अङ्क तालिकामा सुधार गर्न निकै महत्वपूर्ण मानिएको छ।

यसअघि बुधबार भएको खेलमा ओमानसँग १०२ रनको भारी अन्तरले पराजित भएको नेपाल आजको खेलमा जित निकाल्दै पुनरागमन गर्ने दाउमा छ। नेपालले यसै सिरिजको पहिलो खेलमा भने युएईलाई ३७ रनले पराजित गरेको थियो।

अङ्क तालिकाको अवस्था

लिग-२ को ताजा अङ्क तालिका अनुसार नेपाल सातौँ स्थानमा छ। नेपालले हालसम्म खेलेका २२ खेलमध्ये ६ मा जित, १४ मा हार र २ खेलमा अङ्क बाँड्दै कुल १४ अङ्क जोडेको छ। अर्कोतर्फ, युएई २२ खेलमा ६ जित र १६ हारसहित १२ अङ्कका साथ तालिकाको पुछारमा रहेको छ।

हेड-टु-हेड: नेपालको पल्ला भारी

नेपाल र युएईबीच भएका पछिल्ला भिडन्तहरूमा नेपालको नतिजा राम्रो देखिएको छ। यी दुई टोलीबीच भएका पछिल्ला ५ ओडिआई खेलमध्ये नेपालले ३ खेलमा जित निकालेको छ भने युएईले २ खेल आफ्नो पक्षमा पारेको छ। कीर्तिपुर मैदानमा युएई विरुद्ध नेपालको रेकर्ड निकै बलियो छ; यहाँ भएका ७ खेलमध्ये नेपालले ६ खेल जितेको छ भने युएईले मात्र १ खेल जित्न सकेको छ।

नेपालका लागि चुनौती र अवसर

ओमानसँगको खेलमा ब्याटिङ र बलिङ दुवै पक्षमा कमजोर देखिएको नेपालका लागि आजको खेलमा ओपनिङ र मध्यक्रमको ब्याटिङ चल्नु अनिवार्य छ। ओमानविरुद्धको खेलमा नेपालले डिएलएस विधिको सामना गर्नुपरेको थियो भने व्यवस्थापकीय पक्षलाई लिएर पनि क्यानभित्रै आलोचना भइरहेको छ।

आजको खेल नेपाली समय अनुसार बिहान ९:१५ बजे सुरु हुनेछ। एकदिवसीय मान्यतालाई बलियो बनाइराख्न र सन् २०२७ को विश्वकप छनोटको सम्भावना जीवित राख्न नेपाललाई आजको खेलमा जितको विकल्प छैन।