लेख विवरण

काठमाडौं । टी–२० विश्वकपको ३२औं खेलमा श्रीलंकाले अफगानिस्तानलाई ६ विकेटले पराजित गरेको छ । ब्रिस्बेनको गाब्बा मैदानमा भएको समूह–१ को खेलमा टस जितेर पहिले ब्याटिङ गरेको अफगानिस्तानले २० ओभरमा १४४ रन बनायो । जवाफमा श्रीलंकाले १९ औं ओभरमा ४ विकेट गुमाएर लक्ष्य पुरा गर्यो । श्रीलंकाको जितका नायक धनन्जय डी सिल्भा बने । उनले अविजित अर्धशतक बनाएर टोलीलाई जित दिलाए । धनन्जयले ४२ बलमा अविजित ६६ रन बनाए । बलिङमा भानेन्दु हसरंगाले ४ ओभरमा १३ रन दिएर ३ विकेट लिए ।

जितपछि श्रीलंकाको टोली सेमिफाइनलको दौडमा रहेको छ भने अफगानिस्तानको टोली टी–२० विश्वकपबाट बाहिरिएको छ । अफगानिस्तानको टोलीले ४ खेलमा २ अंक मात्र जोड्न सक्यो । प्रतियोगितामा अफगानिस्तानको यो दोस्रो हार हो।

लक्ष्य पछ्याएको श्रीलंकाको सुरुवात राम्रो हुन सकेन । ओपनर पथुम निसान्का १० रन बनाएर मुजिब उर रहमानको शिकार बने । पहिलो ६ ओभरमा अफगान बलरले श्रीलंकाको टोलीलाई दबाबमा राखेको थियो । मध्य ओभरमा राशिद खानले पनि दबाब कायम गर्दै २५ रन बनाएर आउट भएका कुसल मेन्डिसको विकेट लिए । तर धनञ्जय डि सिल्भाले उत्कृष्ट ब्याटिङ गर्दै ४२ बलमा ६६ रनको इनिङ खेले । उनलाई चरित असलंका र भानुका राजपाक्षेको राम्रो साथ मिलेको थियो । अफगानिस्तानका रसिद र मुजिबले २–२ विकेट लिए ।

गाब्बा पिचमा अफगानिस्तानका ब्याट्सम्यानहरु खुलेर खेल्न सकेका थिएनन् । टोलीका ओपनरहरुले ४२ रनको साझेदारी गरे पनि तिब्र गतिमा रन बनाउन सकेनन् । गुरबाजलाई अफगानिस्तानले पहिलो विकेटको रुपमा गुमाएको थियो । उनले २८ रन बनाए । ११ औं ओभरमा हसरंगाले उस्मान घानीलाई प्याभिलियनको बाटो देखाए । इब्राहिम जाद्रान पनि २२ रन बनाएर आउट भए ।

यसैबीच नजिबुल्लाह १८ रनमा आउट भएपछि अफगानिस्तानले ठूलो स्कोर बनाउने आशा समाप्त भयो। लेग स्पिनर हसरंगाले डेथ ओभरमा उत्कृष्ट प्रदर्शन गर्दै अन्तिम ओभरमा दुई विकेट लिएर श्रीलंकाको जित सुनिश्चित गरे।