लेख विवरण

काठमाडौंँ । जिम्बावेमा जारी आइसिसी एकदिवसीय विश्वकप छनोट खेल अन्तर्गत समूह चरणको दोस्रो खेलमा नेपालले मंगलबार (आज) अमेरिकालाई ६ विकेटले पराजित गरेको छ ।

अमेरिकाले दिएको २ सय ८ रनको लक्ष्य नेपाललले ४३ ओभरमा ४ विकेट गुमाएर पुरा गर्यो । टोलीका लागि भिम सार्किले ७७ रनको अविजित पारी खेले । अर्धसतक बनाएका भिमले १ सय १४ बलको समान गर्दै ७ चौंका र १ छक्का प्रहार गरे । अलराउन्डर दिपेन्द्र सिह ऐरिले पनि भिमसँगै ३९ रनको अविजित पारी खेले । बलिङमा उनले ५ ओभरमा १५ रन खर्चेर २ विकेट लिए । नेपालको जितमा ओपनर कुशल भुर्तेलले ३९ रनको योगदान दिए । कप्तान रोहित पौडेल (१६), कुशल मल्ल (१३) र आशिफ शेखले (१२) रन बनाए ।

यसअघि टस हारेर ब्याटिङ गरेको अमेरिकाले ४९ ओभरमा अलआउट हुँदै २ सय ७ रन बनाएको थियो । टोलीका लागि सायन जहाँगिरले १ सय रन बनाएर नटआउट रहे। ७९ बलमा सतक पूरा गरेका उनले १० चौका र ३ छक्का प्रहार गरे। त्यस्तै सुशान्त मोदानीले ४२ र गजानन्द सिंहले २६ रनको योगदान दिए। अमेरिकाका अरू ब्याट्सम्यान दोहरो अंकमा रन बनाउन सकेनन्।

नेपालका तर्फबाट खेलको प्लेयर अफ द म्याच बनेका करण केसीले ४ विकेट लिए। त्यस्तै गुलशन झाले ३, दीपेन्द्रसिंह ऐरीले २ र ललित राजवंशीले १ विकेट लिए।

समूह चरणको पहिलो खेलमा जिम्बावेसँग पराजित भएको नेपाली टोली अमेरिकाविरूद्धको यो खेल जित्नैपर्ने दबाबमा थियो।

छनोट प्रतियोगिताको पहिलो खेलमा नेपाल गत आइतबार जिम्बावेसँग पराजित भएको थियो।