जनकपुरमा महेन्द्रनारायण निधि आमन्त्रित कराते प्रतियोगिता सुरु
धनुषा । जनकपुरधाममा महेन्द्रनारायण निधि आमन्त्रित कराते प्रतियोगिता सुरु भएको छ । आज जनकपुरधामको कभर्ड हलमा सुरु भएको प्रतियोगितामा मधेस प्रदेशका विभिन्न तौल समूहका कराते खेलाडीहरू सहभागी भएका छन् ।
प्रतियोगिताको उद्घाटन गर्दै नेपाली कांग्रेसका सांसद् तथा पूर्वउपसभापति विमलेन्द्र निधिले कराते कुनै पनि अस्तशस्त्र र हतियारको प्रयोग विना आफ्नो कला कौशल र शक्तिले खेलिने खेल रहेकाले अहिंसावादी खेल रहेको बताए । उनले अहिंसावादी खेल कराते अहिंसा र गान्धीवादी नेता स्व महेन्द्रनारायण निधिकै नामबाट आयोजना गरिएकोमा आयोजकलाई धन्यावाद दिए ।
कांग्रेस नेता निधिले जनकपुरधाममा खेलकुदको विकासका लागि प्रस्तावित श्री राम जानकी बहुउद्देश्य अन्तर्राष्ट्रिय रङ्गशालाको निर्माण कुनै पनि हालतमा हुनुपर्ने बताए । निधिले चाहे भारतले बनाओस् कि नेपाल सरकारले तर रङ्गशाला बन्नुपर्ने आफ्नो धारणा राखे ।
जनकपुरधामका मेयर मनोजकुमार साह र उपमेयर किशोरी साहले, कांग्रेस धनुषाका सभापति योगेन्द्र पजियार लगायतले खेलकुदको महत्वबारे चर्चा गर्दै जनकपुरधाममा खेलकुद विकास र पूर्वाधारमा ध्यान केन्द्रित हुनुपर्ने बताए ।
सो अवसरमा राष्ट्रपति रनिङ शिल्ड प्रतियोगिता २०८० मा पदक विजेता मधेश प्रदेशकी खेलाडीद्वय पोर्सिया चौधरी र सुजता परियारलाई सम्मान गरिएको थियो । नेपाल लोकतान्त्रिक खेलकुद सङ्घ धनुषा र अध्यक्ष अखिल मढीको आयोजनामा भएको प्रतियोगितामा विभिन्न तौल समूहमा भएको करातेमा मधेसका धनुषा, महोतरी, सिरहा तथा सप्तरी जिल्लाका खेलाडीको सहभागिता रहेको थियो ।
प्रतियोगितामा महोत्तरी प्रथम, सप्तरी द्वितीय र महोत्तरीको खैरमारा तृतीय भएको थियो । विजेता हरेक खेलाडीलाई गोल्ड मेडल र एक हजार नगद प्रदान गरिएको आयोजकले जनाएको छ । समुद्घाटन समारोहमा नेपाली कांग्रेसका नेताहरु, करातेका प्रशिक्षक र पूर्वखेलाडीसहितको उपस्थिति थियो ।
टिप्पणी लेख्नुहोस्