लेख विवरण

काठमाडौं । महिला बिग ब्यास लिगमा १९ वर्षीया टेस फ्लिन्टपले सबैभन्दा छिटो अर्धशतक प्रहार गर्ने कीर्तिमान बनाएकी छिन । मेलबर्न स्टार्सका लागि खेल्दै उनले १६ बलमा अविजित ५१ रन बनाइन । एडिलेड स्ट्राइकर्सलाई २२ रनले पराजित गर्न उनले महत्वपूर्ण योगदान दिइन। फ्लिन्टपअघि यो कीर्तिमान अष्ट्रेलियाकी अलराउन्डर एश्ले गार्डनर र दक्षिण अफ्रिकाकी लिजेल लीको नाममा थियो । यी दुवै खेलाडीले २२ बलमा अर्धशतक बनाएका थिए । दुबैले सन् २०१७ मा यो कीर्तिमान बनाएका थिए ।

फ्लिन्टपले आफ्नो पारीमा ६ चौका र तीन छक्का प्रहार गरिन । उनले इनिङ्सको अन्तिम बलमा छक्का प्रहार गर्दै टोलीको स्कोर पाँच विकेटमा १८६ रन पुर्याएकी थिइन ।

पछिल्ला तीन खेलमा ब्याटिङ गर्ने मौका नपाएकी फ्लिन्टपले यसअघि पर्थ स्कोर्चर्सविरुद्ध अविजित ४० रन बनाएकी थिइन । मेलबर्न स्टार्सको जितमा इंग्ल्याण्डका एलिस क्याप्सी र लरेन विन्फिल्ड हिलले पनि महत्वपूर्ण योगदान दिएकी थिइन । दुवैले दोस्रो विकेटका लागि ८१ रनको साझेदारी गरेका थिए। विनफिल्डले ४७ र क्याप्सीले ४९ रन बनाइन ।

मेलबर्न स्टार्सको १८६ रनको जवाफमा एडिलेड स्ट्राइकर्सको टोली १६४ रन मात्रै बनाउन सक्यो । स्ट्राइकर्सकी केटी म्याकले सर्वाधिक ४७ रन बनाइन । ब्रिजिट प्याटरसनले ४१ रन बनाइन् । मेलबर्नका लागि साशा मोलोनीले ४ विकेट लिइन ।

प्रतियोगितामा मेलबर्न स्टार्सको यो दोस्रो जित हो । एडिलेड चार जितसहित अंक तालिकाको तेस्रो स्थानमा छ।