मेयर कप भलिबल : एपिएफ र आर्मीको विजयी सुरुवात
ललितपुर । मेयर कप खुल्ला महिला तथा पुरुष भलिबल प्रतियोगितामा एपिएफ र त्रिभुवन आर्मी क्लबले विजयी सुरुवात गरेका छन ।
ललितपुरको जावलाखेल भलिबल प्रशिक्षण केन्द्रको कभर्डहलमा आइतवार भएको खेलमा एपिएफले आयोजक ललितपुर महानगरपालिकालाई ३–० को सेटमा पराजित गर्यो ।
एपिएफले ललितपुरलाई २५–६, २५–७ र २५–१४ को सेटमा हरायो ।
आइतवार भएको अर्को खेलमा आर्मीले कोटेश्वर मल्टिपल क्याम्पसलाई ३–० को सेटमा पराजित गर्यो । आर्मीले कोटेश्वरमाथी २५–६, २५–४ र २५–५ को जित निकाल्यो ।
पुरुष तर्फ भएको खेलमा ललितपुर र नेपाल गणतान्त्रिक खेलकुदले जित निकाल्यो । ललितपुरले बोगटी समाज ललितपुरलाई २५–१२, २५–१८ र २५–१९ को सेटमा पराजित गर्यो ।
नेपाल गणतान्त्रिकले पाटन मल्टिपल क्याम्पसलाई २५–१२, २५–२० र २५–१५ को सेटमा पराजित गर्यो ।
ललितपुर महानगरपालिकाको आयोजना र जावलाखेल भलिबल प्रशिक्षण केन्द्रको व्यबस्थापनमा जारी प्रतियोगितामा पुरुष तर्फ ८ र महिला तर्फ ७ टोलीको सहभागिता रहेको छ ।
प्रतियोगिताको विजेता टोलीले २ लाख, उप–विजेताले १ लाख तथा तेस्रो स्थान प्राप्त गर्नेले ५० हजार रुपैयाँ प्राप्त गर्ने आयोजकले जनाएको छ ।
टिप्पणी लेख्नुहोस्