लेख विवरण

काठमाडौंँ । दुई पटकको आईपीएल च्याम्पियन कोलकाता नाइट राइडर्स (केकेआर) चार वर्षपछि आफ्नो घरेलु मैदानमा खेल्दै छ । रोयल च्यालेन्जर्स बैंगलोरविरुद्धको खेलमा केकेआरले पहिले ब्याटिङ गरेको थियो । खराब सुरुवातपछि पनि टोलीले २०४ रन बनाउन सफल भयो ।

ब्याटिङमा राम्रो सुरुआत गरेको आरसीबीलाई केकेआर स्पिनहरु वरुण चक्रवर्ती र सुनिल नारायणले प्याभिलियन पठाउन थाले । मिस्ट्री स्पिनर वरुण चक्रवर्तीले आफ्नो पहिलो ओभरबाटै चमत्कार गर्न थाले । उनले फाफ डु प्लेसिसलाई बलिङ गरे, तर फाफले उनको गुगली बुझ्न सकेनन् र बोल्ड भए । आफ्नो अर्को ओभरको दोस्रो बलमा वरुणले म्याक्सवेललाई पनि बोल्ड गरे। फाफले जस्तै म्याक्सवेलले पनि वरुणको बलिङ लाइन बुझ्न सकेनन् । त्यसको दुई बलपछि वरुणले हर्षल पटेललाई पनि प्याभिलियन पठाए । ब्याटिङ अर्डरमा बढुवा भएका हर्षल पनि बोल्ड भए ।

यसअघि सुनिल नारायणले विराट कोहलीलाई आउट गरेर केकेआरलाई पहिलो सफलता दिलाएका थिए । विराट पनि सोही शैलीमा आउट भए । नारायणको बल पिचमा खसेपछि सिधै भित्र आयो र पूर्व भारतीय कप्तानले बुझ्न सकेनन् । बल सिधै विकेटमा गयो र उनको इनिङ्स समाप्त भयो।

शार्दुल ठाकुर (६८) र रहमानुल्लाह गुरबाज (५७ रन) को अर्धशतकीय मद्दतमा केकेआरले आरसीबी विरुद्ध ७ विकेट गुमाएर २०४ रन बनायो । यी दुई बाहेक रिंकु सिंहले ४६ रनको योगदान दिए । आरसीबीका लागि डेभिड विली र कर्ण शर्माले २–२ विकेट लिए भने माइकल ब्रेसवेल, हर्षल पटेल र मोहम्मद सिराजले एक–एक विकेट लिए ।