लेख विवरण

हरारे। जिम्बाब्वेमा सम्पन्न जिम अफ्रो टी–१० को फाइनलमा डरबन कलन्दर्सले जोहानेसबर्ग बफेलोजलाई ८ विकेटले पराजित गर्दै लिगको उपाधि उचालेको छ । फाइनल खेलमा टस जितेर पहिले बलिङ गर्ने डरबन कलन्दर्सको निर्णय सहि साबित भयो । हरारे स्पोर्ट्स क्लब मैदानमा पहिले ब्याटिङ गर्न आएको जोहानेसबर्गको टोलीले निर्धारित १० ओभरमा चार विकेट गुमाएर १२७ रन बनाएको थियो ।

टोलीका लागि टम ब्यान्टनले १७ बलको सामना गर्दै २ चौका र ३ छक्काको मद्दतमा सर्वाधिक ३६ रन बनाए । उनी बाहेक कप्तान मोहम्मद हफिजले १३ बलमा ३२ रन बनाए । युसुफ पठानले १४ बलमा ५ चौकाको मद्दतले २५ रन बनाए । यसरी टोलीले १२७ रन बनाउन सफल भयो ।

जवाफमा डरबन कलन्दर्सले चार बल बाँकी रहँदै अन्तिम ओभरमा लक्ष्य पूरा गर्‍यो। टोलीका तर्फबाट हजरतुल्लाह जाजाईले फिनिशरको भूमिका निर्वाह गर्दै टोलीलाई ऐतिहासिक जित दिलाए । उनले २२ बलमा एक चौका र चार छक्का प्रहार गर्दै अविजित ४३ रन बनाए ।

यसबाहेक टिम सेफर्टले १४ बलमा ३० रन बनाए । सोही क्रममा आन्द्रे फ्लेचरले ११ बलमा ३ चौका र २ छक्का प्रहार गर्दै २९ रनको इनिङ खेले । जोहानेसबर्गका लागि उस्मान शिनवारीले सर्वाधिक २ विकेट लिए । यसरी जोहानेसबर्ग बफेलोजलाई हराउँदै डरबन कलन्दर्सले पहिलो पटक टी–१० लिगको उपाधि जितेको छ ।