लेख विवरण

गण्डकी । गण्डकी प्रदेश नेवार समुदायका युुवालाई एकताबद्ध तुल्याउन विगत सात वर्षदेखि हरेक वर्ष हुँदै आएको फाइभ ए साइड फुटसल प्रतियोगिता बिहीवारदेखि सुरु भएको छ । नेवाः ल्यामपुच कास्कीले प्रतियोगिता आयोजना गरेको हो ।

तीन दिनसम्म सञ्चालन हुने फाइभ ए साइड प्रतियोगिताको यो सातौँ संस्करणमा रामकृष्ण टोल ल्यामपुच कास्कीको व्यवस्थापनमा रामकृष्ण टोलस्थित वि फिट फुटसल ग्राउण्डमा सुरु प्रतियोगितामा कास्की जिल्लाभित्रका १६ वटा नेवारी समुदायका टिमको सहभागिता छ ।

प्रतियोगिताको उद्घाटन कार्यक्रममा नेवा खल कास्कीका अध्यक्ष अशोक पालिखेले नेवारी समुदायभित्र आपसी सम्बन्ध बढाउन खेलकुद प्रतियोगिता आवश्यक रहेको बताए ।

पोखरा महानगरपालिका–४ का वडाध्यक्ष देवकृष्ण पराजुलीले समुदायस्तरबाटै हुने यस्ता प्रतियोगिताले राष्ट्रिय खेलाडी उत्पादनमा भूमिका निर्वाह गर्ने धारणा व्यक्त गरे ।

पोखरा उद्योग वाणिज्य सङ्घका अध्यक्ष पवन प्रजापतिले संस्थाको सामाजिक उत्तरदायित्वस्वरुप यस्ता क्रियाकलाप आवश्यक रहेकामा जोड दिँदै युुवा जनशक्तिलाई देशभित्र बस्ने वातावरण बनाउन युुवामैत्री क्रियाकलाप आवश्यक हुने बताए ।