लेख विवरण

काठमाडौंँ । जमैकाका धावक क्रिस्टोफर टेलरलाई एन्टी डोपिङ नियम उल्लंघन गरेको आरोपमा ३० महिनाको प्रतिबन्ध लगाइएको छ । एथलेटिक्स इन्टिग्रिटी युनिट (एआईयू) ले शुक्रबार उक्त जानकारी दिएको हो ।

सन् २०२२ को विश्व च्याम्पियनसिपमा जमैकालाई ४०० मिटर रिलेमा रजत पदक दिलाउन महत्वपूर्ण भूमिका निर्वाह गरेका टेलरले करिब एक वर्षअघि प्रतियोगिताबाहिरको परीक्षणमा नमूना संकलन गर्न नसकेको एआईयूले जनाएको छ ।

यस वर्षको सुरुवातमा टेलरलाई एथलेटिक्स इन्टिग्रिटी युनिट (एआईयू) ले विश्व एन्टी डोपिङ एजेन्सी (वाडा) को एन्टी डोपिङ कोडको धारा २.३ उल्लङ्घन गरेको आरोप लगाएको थियो। ६ महिनाको अनुसन्धानपछि सन् २०२२ को नोभेम्बरमा २३ वर्षीय टेलर डोपिङ परीक्षणबाट बचेको खुलासा भएको थियो ।

टेलरलाई नोभेम्बर २०२२ मा एन्टी डोपिङ अधिकारीहरूले सम्पर्क गरेका थिए र उनले सूचीबद्ध गरेको स्थानमा परीक्षण गर्न आएका थिए।

यद्यपि, जब अधिकारीहरू आइपुगे, टेलर सूचीबद्ध स्थानमा थिएनन् र उनले आफ्नो ठेगानाको जानकारी अद्यावधिक गरेका थिएनन्। त्यसको साटो टेलर नोर्मन म्यानली अन्तर्राष्ट्रिय विमानस्थलमा थिए ।

यो निलम्बन एक वर्ष पहिलेदेखि नै लागू भएको छ र टेलर मे २०२५ मा फेरि प्रतिस्पर्धा गर्न योग्य हुनेछन्।