लेख विवरण

काठमाडौंँ । केन विलियम्सन एक वर्षपछि अन्तर्राष्ट्रिय टी–२० क्रिकेटमा फर्किएका छन् । न्यूजिल्याण्ड क्रिकेट बोर्डले बंगलादेशविरुद्धको घरेलु टी–२० सिरिजका लागि टोली घोषणा गरेको छ जसमा विलियम्सन कप्तानको रुपमा फर्किएका छन् । बंगलादेशविरुद्धको टी–२० सिरिजमा विलियम्सन न्युजिल्यान्ड टोलीको कप्तान हुनेछन् । उनले गत नोभेम्बर यता कुनै पनि अन्तर्राष्ट्रिय टी–२० खेल खेलेका छैनन् । यस अवधिमा उनी करिब ६ महिना घाइते भए ।

आईपीएल २०२३ को पहिलो खेलमा गुजरात टाइटन्सबाट खेल्ने क्रममा विलियम्सन घाइते भएका थिए । बाउन्ड्री लाइनमा फिल्डिङ गर्ने क्रममा बललाई छक्का तर्फ जानबाट रोक्ने प्रयास गरेका विलियम्सनले आफ्नो सन्तुलन गुमाए र तल खसेपछि उनी गम्भीर एसीएल चोटको शिकार भए। त्यसबेलादेखि उनी क्रिकेटबाट धेरै महिना टाढा रहे । भर्खरै सम्पन्न एकदिवसीय विश्वकप २०२३ मा उनले टोलीमा पुनरागमन गरे। अब उनी टी-२० टोलीमा पनि फर्किएका छन्, जहाँ उनले न्यूजिल्याण्डका मुख्य ओपनर ब्याट्सम्यान डेभोन कोनवे बिना नै टिमको ब्याटिङ सम्हाल्नेछन्। डेभन कन्वेलाई कार्यभार व्यवस्थापन आधारमा विश्राम दिइएको छ।

न्यूजिल्याण्डको टोलीमा विलियम्सन बाहेक ओपनिङ विकल्पका रूपमा फिन एलेन, टिम सेफर्ट जस्ता ब्याट्सम्यान छन्। मिडल अर्डरमा डेरिल मिचेल, मार्क च्याम्पम्यान, जेम्स या जिमी नीशम जस्ता ब्याट्सम्यान समावेश छन्। ग्लेन फिलिप्सलाई फिनिशर वा ओपनिङ ब्याट्सम्यानको रूपमा न्यूजिल्याण्डले प्रयोग गर्न सक्छ। टिम साउथीसँगै काइल जेम्सन र एडम मिललाई पनि फास्ट बलरको रुपमा टोलीमा समावेश गरिएको छ भने ड्यारिल मिचेल र जिम्मी निशमले मध्यम गतिका बलिङ अलराउन्डरको भूमिका खेल्न सक्नेछन् ।

माइकल ब्रेसवेल, लोकी फर्गुसन, म्याट हेनरी र हेनरी शिप्ले चोटका कारण न्यूजिल्याण्डको टी-२० टोलीमा छनोट भएका छैनन्। साथै, ट्रेन्ट बोल्टले यस शृङ्खलाका लागि आफूलाई उपलब्ध गराउन सकेनन्, त्यसैले पनि उनी यो टोलीमा छैनन्। जसका कारण फास्ट बलर बेन सियर्सलाई पनि टोलीमा समावेश गरिएको छ । गत सेप्टेम्बरमा इंग्ल्याण्डविरुद्धको टी–२० खेल खेल्न नसकेका जेम्स निशम पनि टोलीमा फर्किएका छन् ।

न्युजिल्याण्डको टी-२० टोलीः केन विलियम्सन (कप्तान), फिन एलेन, मार्क च्याम्पम्यान, काइल जेम्सन, एडम मिल्स, डेरिल मिचेल, जेम्स निशम, ग्लेन फिलिप्स, मिचेल सान्टनर, बेन सेयर्स, टिम सेफर्ट, ईश सोधी र टिम साउथी।