अन्तरप्रदेशस्तरीय महिला टि-२० क्रिकेट प्रतियोगिताको खेलतालिका सार्वजनिक
चितवन । समाजसेवी मैयादेवी श्रेष्ठको प्रथम पुण्य स्मृतिमा हुने अन्तरप्रदेशस्तरीय महिला टि-२० क्रिकेट प्रतियोगिताको खेलतालिका सार्वजनिक भएको छ । नेपाल लोकतान्त्रिक खेलकुद सङ्घको आयोजनामा हुन लागेको प्रतियोगितामा सात प्रदेशका यू-१९ महिला टोलीले सहभागिता जनाउने भएका छन् ।
प्रतियोगिता यही माघ १२ देखी १९ गतेसम्म चितवनको गौतमबुद्ध अन्तर्राष्ट्रिय क्रिकेट रङ्गशालामा हुने भएको छ । प्रतियोगितामा सातवटा प्रदेशका एक/एक वटा समूहको सहभागिता रहने छ । सो प्रतियोगितामा १९ वर्षमुनिका एक सयभन्दा बढी महिला खेलाडीले सहभागिता जनाउने आयोजकले जानकारी दिएको छ ।
प्रतियोगितामा प्रथम हुने टोलीले रु एक लाख ७९ हजार सात सय पाँच र द्वितीय हुनेले रु ९५ हजार सात सय पाँच प्राप्त गर्नेछन् । प्रतियोगिता सम्पन्न गर्न रु ५० लाख खर्च हुने अनुमान गरिएको छ । नेपाल क्रिकेट सङ्घको समन्वयमा वार्षिक कार्यतालिकामै राखेर सो प्रतियोगिता गरिने आयोजकको भनाइ छ ।
आज सार्वजनिक गरिएको तालिका अनुसार प्रतियोगिताको पहिलो खेल माघ १२ मा गण्डकी र सुदुरपश्चिम प्रदेश एक आपसमा भिड्ने भएका छन । प्रतियोगिताको समुह ए मा गण्डकी, सुदुरपश्चिम, कोशी र मधेश प्रदेश रहेका छन् भने समुह बी मा कर्णाली, बागमती र लुम्बिनी प्रदेश रहेका छन् ।
खेलतालिका :
| मिती | पहिलो खेल (बिहान ९ः३० बजे) | दोस्रो खेल (दिउँसो १ः३० बजे) |
| माघ १२ गते | गण्डकी प्रदेश विरुद्ध सुदुरपश्चिम प्रदेश | |
| माघ १३ गते | कोशी प्रदेश विरुद्ध गण्डकी प्रदेश | सुदुरपश्चिम प्रदेश विरुद्ध मधेश प्रदेश |
| माघ १४ गते | कर्णाली प्रदेश विरुद्ध बागमती प्रदेश | मधेश प्रदेश विरुद्ध कोशी |
| माघ १५ गते | कोशी प्रदेश विरुद्ध सुदुरपश्चिम प्रदेश | बागमती प्रदेश विरुद्ध लुम्बिनी प्रदेश |
| माघ १६ गते | गण्डकी प्रदेश विरुद्ध मधेश प्रदेश | लुम्बिनी प्रदेश विरुद्ध कर्णाली प्रदेश |
| माघ १७ गते | पहिलो सेमिफाइनल (समुह ए विजेता विरुद्ध समुह बी उपविजेता) | दोस्रो सेमिफाइनल (समुह बी विजेता विरुद्ध समुह ए उपविजेता) |
| माघ १८ गते | रेस्ट डे | |
| माघ १९ गते | फाइनल |
प्रतियोगिताको खेलतालिका
टिप्पणी लेख्नुहोस्