लेख विवरण

काठमाडौंँ । भारतीय क्रिकेट टोलीका पूर्व ओपनर लालचन्द राजपुत संयुक्त अरब इमिरेट्स (युएई)को पुरुष क्रिकेट टोलीका मुख्य प्रशिक्षकमा नियुक्त भएका छन् । राजपुत ३ वर्षका लागि प्रशिक्षक बनेका हुन् । ६२ वर्षीय लालचन्दले अब पाकिस्तानका मुदस्सर नजरको स्थान लिनेछन् । पूर्व भारतीय क्रिकेटरको पहिलो जिम्मेवारी आईसीसी क्रिकेट विश्वकप लिग २ त्रिकोणीय शृंखला हुनेछ जसमा स्कटल्याण्ड र क्यानडाका टोली रहेका छन्, जुन फेब्रुअरी २८ देखि संयुक्त अरब इमिरेट्सले आयोजना गर्दैछ। यसपछि अर्को महिना स्कटल्याण्डसँग तीन खेलको टी–२० अन्तर्राष्ट्रिय सिरिज खेल्नेछ ।

यस वर्ष अमेरिका र वेस्ट इन्डिजमा हुने टी–२० विश्वकपमा युएई छनोट हुन असफल भएपछि ६२ वर्षीय लालचन्द राजपुतलाई मुख्य प्रशिक्षकमा घोषणा गरिएको थियो । भारतका लागि २ टेस्ट र ४ एकदिवसीय खेल खेलेका राजपूतले बुधबार इमिरेट्स क्रिकेट बोर्डले जारी गरेको विज्ञप्तिमा भनेका छन्, "युएई हालैका वर्षहरूमा बलियो एसोसिएट सदस्य भएको छ र खेलाडीहरूले एकदिवसीय र टी-२० दुवैमा राम्रो प्रदर्शन गरेका छन्। टोलीका खेलाडीहरू धेरै प्रतिभाशाली छन् र म उनीहरूको क्रिकेट कौशल सुधार गर्ने काम गर्न उत्साहित छु। निरन्तर राम्रो प्रदर्शन गर्दै टोलीलाई अगाडि बढाउने मेरो लक्ष्य हुनेछ । मैले टोलीलाई अर्को स्तरमा लैजानु पर्छ र म विश्वस्त छु कि यो गर्न पूर्ण रूपमा सक्षम छ।"

लालचन्द राजपुत भारतको प्रशिक्षक हुँदा टिमले सन् २००७ मा पहिलो टी–२० विश्वकप जितेको थियो, उनले सन् २०१६–१७ को बीचमा अफगानिस्तानको प्रशिक्षकको भूमिका निर्वाह गरेका थिए । उनको अघिल्लो कार्यकाल जिम्बाब्वे (२०१८-२२) मा थियो। उनले टोलीलाई सन् २०२२ मा अस्ट्रेलियामा हुने टी–२० विश्वकपका लागि छनोट हुन मद्दत गरेका थिए जहाँ उनीहरू सुपर १२ चरणमा पुगेका थिए।