लेख विवरण

काठमाडौंँ । सन् २०२४ को टी–२० विश्वकपअघि पाकिस्तानले इंग्ल्यान्ड र आयरल्यान्डको भ्रमण गर्नेछ भने टोलीले यसै वर्षको अन्त्यमा दक्षिण अफ्रिकाको भ्रमण गर्नेछ। पाकिस्तान क्रिकेट बोर्डले भ्रमणको सम्पूर्ण तालिका सार्वजनिक गरेको छ, जसमा दुई टोलीबीच पहिलो तीन खेलको टी–२० सिरिज हुनेछ र त्यसपछि तीन एकदिवसीय खेलको सिरिज हुनेछ । अन्तमा, पाकिस्तान टोलीको दक्षिण अफ्रिकी भ्रमण दुई म्याचको टेस्ट शृङ्खलाका साथ समाप्त हुनेछ।

पाकिस्तानी टोलीले दक्षिण अफ्रिका भ्रमणमा पहिले ३ खेलको टी–२० सिरिज खेल्नेछ । पहिलो खेल डिसेम्बर १० मा डरबन मैदानमा हुनेछ। त्यसपछि दुई टोलीबीचको दोस्रो र तेस्रो टी–२० खेल १३ डिसेम्बर सेन्चुरियन र १४ डिसेम्बरमा जोहानेसबर्गमा हुनेछ । सन् २०२५ मा हुने आईसीसी च्याम्पियन्स ट्रफीको तयारीलाई ध्यानमा राख्दै यस भ्रमणमा दुई टोलीबीच ३ खेलको एकदिवसीय सिरिज पनि हुनेछ । जसमा पहिलो एकदिवसीय खेल १७ डिसेम्बरमा पार्लको मैदानमा हुनेछ भने सिरिजको अन्तिम दुई खेल डिसेम्बर १९ मा केप टाउन र २२ डिसेम्बरमा जोहानेसबर्गको मैदानमा हुनेछ ।

यस भ्रमणमा पाकिस्तानी टोलीले दक्षिण अफ्रिकासँग २ खेलको टेस्ट शृंखला पनि खेल्ने छ, जुन आईसीसी विश्व टेस्ट च्याम्पियनसिपको तेस्रो संस्करणको पनि हो। बक्सिङ डे टेस्ट खेल २६ देखि ३० डिसेम्बरसम्म सेन्चुरियन मैदानमा हुनेछ । यस सिरिजको दोस्रो र अन्तिम खेल सन् २०२५ को सुरुमा जनवरी ३ देखि ७ सम्म केप टाउनको मैदानमा खेलाइनेछ। पाकिस्तानको टोली हाल ३६.६६ प्रतिशत अंकसहित विश्व टेस्ट च्याम्पियनसिप २०२३-२०२५ को अंक तालिकामा पाँचौं स्थानमा छ भने दक्षिण अफ्रिकाको टोली २५ प्रतिशत अंकसहित आठौं स्थानमा छ।