लेख विवरण

काठमाडौंँ । अन्तर्राष्ट्रिय क्रिकेट काउन्सिल (आइसिसी) ले टी–२० विश्वकपको अभ्यास खेलको तालिका सार्वजनिक गरेको छ । आगामी महिना अमेरिका र वेस्ट इन्डिजमा आयोजना हुने टी–२० विश्वकपअघि नेपालले मे २७ मा क्यानडासँग पहिलो अभ्यास खेल खेल्नेछ । त्यस्तै मे ३० मा नेपाललले दोस्रो अभ्यास खेल आयोजक राष्ट्र अमेरिकासँग खेल्ने छ । दुवै खेल अमेरिकाको डल्लासमा हुनेछ ।

विश्वकपमा सहभागी हुने २० मध्ये १७ टोलीले मात्र अभ्यास खेलमा सहभागिता जनाउनेछन् । पाकिस्तान, इंग्ल्यान्ड र न्युजिल्यान्ड अभ्यास खेलमा सहभागिता जनाउने छैनन् ।

अभ्यास खेलहरु अमेरिका र वेस्ट इन्डिजको ट्रिनिडाड एण्ड टोबागोमा मे २७ देखि जुन १ सम्म हुनेछ ।

अभ्यास खेल २० ओभरको हुनेछ र उनीहरूले अन्तर्राष्ट्रिय टी–२० मान्यता पाउने छैनन् । यससँगै टिमले टोलीमा रहेका सबै १५ खेलाडीलाई मैदानमा उतार्न पाउनेछन् ।

टी–२० विश्वकपमा नेपालले आफ्नो पहिलो खेल जुन ४ मा नेदरल्याण्डसँग खेल्नेछ । दोस्रो खेल जुन ११ मा श्रीलंका, तेस्रो जुन १४ मा दक्षिण अफ्रिका र चौथो खेल जुन १६ मा बङलादेशसँग खेल्नेछ ।