लेख विवरण

स्याङ्जा | अर्जुनचौपारी

स्याङ्जा जिल्लाको अर्जुनचौपारी गाउँपालिका–५, आरुचौर थाप्लेमा निर्माण भइरहेको “अर्जुनचौपारी थाप्ले क्रिकेट ग्राउन्ड” अहिले निर्माणको अन्तिम चरणमा पुगेको छ। डहरे देउरालिको काखमा फैलिएको यस स्थानीय मैदानले खेलकुद प्रवर्द्धनसँगै समाजमा सामूहिक एकताको भावना स्थापित गर्ने लक्ष्य लिएको छ।

स्थानीय युवा, विद्यालय, क्लब तथा छिमेकी पालिका र जिल्लाका प्रतिभाशाली क्रिकेटरहरूलाई अभ्यास, प्रशिक्षण र प्रतियोगिताको अवसर प्रदान गर्ने उद्देश्यले यो मैदान निर्माण गरिएको हो। आयोजकको भनाइ अनुसार, “खेलले बनाउँछ राष्ट्र” भन्ने मूल मन्त्रलाई आत्मसात गर्दै मैदानमार्फत सामुदायिक चेतना र खेलकुद संस्कृतिको विकास गर्न लागिएको हो।

स्थानीय तहदेखि विश्व क्रिकेटसम्म जोड्ने सपना

मैदान निर्माण सम्पन्न भएपछि गण्डकी टी-१० क्रिकेट प्रतियोगिता आयोजना गर्ने तयारी पनि थालिएको छ। साथै, स्थानीय, जिल्ला, प्रदेश, राष्ट्र तथा अन्तर्राष्ट्रिय स्तरका क्रिकेट गतिविधिहरूलाई सम्बोधन गर्दै सूचना र समाचार प्रवाहको संयन्त्र पनि विकास गरिने जनाइएको छ।

सहभागिता र समर्थनको अपिल

स्थानीय स्तरमै स्थापित हुन लागेको यस खेलकुद संरचनाले भविष्यमा राष्ट्रियस्तरका खेलाडी उत्पादन गर्न सक्ने आयोजकहरूको विश्वास छ। उनीहरूले यस कार्यमा सबैलाई हातेमालो गर्न आह्वान गर्दै भनेका छन्, “यो हाम्रो मात्र परियोजना होइन, सम्पूर्ण समुदायको साझा सपना हो। यसमा तपाईंहरूको सहयोग, साथ र सहभागिता हाम्रो लागि प्रेरणाको स्रोत हुनेछ।”