लेख विवरण

काठमाडौंँ । श्रीलंकाको राष्ट्रिय पुरुष क्रिकेट टोली आगामी अगस्ट र सेप्टेम्बर महिनामा जिम्बावे भ्रमण गर्ने भएको छ। जिम्बावे क्रिकेट बोर्डले पुष्टि गरेअनुसार श्रीलंका दुई एकदिवसीय अन्तर्राष्ट्रिय (ODI) र तीन ट्वेन्टी–२० अन्तर्राष्ट्रिय (T20I) खेलका लागि जिम्बावे आउँदैछ। सबै खेलहरू हरारे स्पोर्ट्स क्लबमा आयोजना हुनेछन्।

शृंखला अगस्त २९ र ३१ मा हुने दुई एकदिवसीय खेलहरूबाट सुरु हुनेछ, त्यसपछि सेप्टेम्बरको सुरुवातमा तीन टि–२० खेलहरू हुनेछ।

जिम्बावेका लागि यो भ्रमण विशेष महत्वको मानिएको छ, किनभने आगामी सेप्टेम्बर १९ देखि अक्टोबर ४ सम्म जिम्बावेमै आयोजना हुने ICC पुरुष T20 विश्वकप अफ्रिका क्षेत्रीय फाइनलको तयारीका लागि यो शृंखला उपयोगी हुनेछ। उक्त फाइनलबाट दुई अफ्रिकी राष्ट्रले २०२६ मा भारत र श्रीलंकाले सह–आयोजना गर्ने T20 विश्वकपका लागि छनोट पाउनेछन्।

जिम्बावे क्रिकेटका प्रबन्ध निर्देशक गिभेमोर माकोनीले भने: “श्रीलंकाको भ्रमणलाई पुष्टि गर्न पाउँदा हामी निकै उत्साहित छौं। यी दुई राष्ट्रबीच सधैं प्रतिस्पर्धात्मक र मनोरञ्जनात्मक क्रिकेट हुँदै आएको छ। यो शृंखला विश्वकप छनोट तयारीको हिसाबले हाम्रो टोलीका लागि अति महत्त्वपूर्ण हुनेछ।”

श्रीलंका र जिम्बावेबीचको पछिल्लो भेट सन् २०२४ को जनवरीमा श्रीलंकामा भएको थियो, जहाँ घरेलु टोलीले तीन खेलको एकदिवसीय शृंखला २–० ले जितेको थियो।

शृंखलाको तालिका:

अगस्त २९ – पहिलो एकदिवसीय
अगस्त ३१ – दोस्रो एकदिवसीय
सेप्टेम्बर ३ – पहिलो टि–२०
सेप्टेम्बर ६ – दोस्रो टि–२०
सेप्टेम्बर ७ – तेस्रो टि–२०

जिम्बावेले यसअघि दक्षिण अफ्रिकासँग दुई टेस्टको घरेलु शृंखला खेल्नेछ भने त्यसपछि न्यूजिल्याण्ड र दक्षिण अफ्रिकासँग त्रिकोणात्मक एकदिवसीय शृंखलामा पनि सहभागी हुनेछ।

श्रीलंका भने हाल बंगलादेशविरुद्ध घरेलु टेस्ट शृंखलामा व्यस्त छ, जसपछिको सेतो बल (ODI र T20I) श्रृंखला बंगलादेशसँग हुनेछ।