लेख विवरण

काठमाडौं, साउन १ – ईन्फिनिटी ड्रिम्सको आयोजनामा हुन लागेको दोस्रो संस्करणको वात्सल्य एभरेष्ट महिला भलिबल लिग (ईडब्लुभिएल) का लागि ऐतिहासिक खेलाडी अक्सन कार्यक्रमको सम्पूर्ण तयारी पूरा भएको छ।

साउन २ गते (बुधबार) सोल्टी होटल, काठमाडौं मा हुने अक्सन कार्यक्रम दिउँसो ३ बजेदेखि सुरु हुनेछ। नेपाली भलिबलको इतिहासमै पहिलो पटक अघिल्लो वर्ष आयोजना गरिएको महिला फ्रेन्चाइज लिग सफल भएको थियो, र त्यसको निरन्तरतास्वरूप यो वर्ष दोस्रो संस्करण भदौमा आयोजना हुँदैछ।

यस वर्ष लिगको अर्को विशेषता भनेकै खेलाडी अक्सन प्रणाली हो। अक्सनमा सहभागी ६ फ्रेन्चाइज टोलीहरू – कर्णाली यशविस, ललितपुर क्विन्स, काठमाडौं स्पाइकर्स, मधेश युनाइटेड, पोखरा निन्जाज, र लुम्बिनी लाभाज – ले खेलाडी छनोट गर्नेछन्।

अक्सनमा कुल ६८ खेलाडीहरू समावेश गरिएका छन्, जसलाई क्याटेगोरी A, B र C मा वर्गीकृत गरिएको छ। हरेक टिमले अनिवार्य रूपमा:

• क्याटेगोरी A बाट १ जना,

• क्याटेगोरी B बाट ३ जना,

• क्याटेगोरी C बाट ३ जना खेलाडी अक्सनमार्फत लिने छन्।

क्याटेगोरी A मा कुल १३ खेलाडी छन्। यीमध्ये ६ जना खेलाडीलाई प्रत्येक टोलीले मार्की प्लेयरको रूपमा अघिनै छानिसकेका छन्, बाँकी ७ खेलाडी अक्सनमा उपलब्ध हुनेछन्।
क्याटेगोरी B मा ४३ खेलाडी र क्याटेगोरी C मा १८ खेलाडी छन्।

अक्सन प्रक्रियामा यदि क्याटेगोरी A का कुनै खेलाडी अनसोल्ड भएमा, उनीहरू स्वतः B क्याटेगोरीमा घटुवा हुनेछन्। यस्तै, B मा अनसोल्ड खेलाडीहरू C क्याटेगोरीमा स्थानान्तरण हुनेछन्।

आयोजक इन्फिनिटी ड्रिम्सका अनुसार अक्सन प्रणालीले नेपाली महिला भलिबलमा पारदर्शिता, प्रतिस्पर्धा र व्यावसायिकता थप गर्नेछ। लिगको यो प्रयासले महिला खेलाडीहरूको अवसर र सम्मानमा ऐतिहासिक परिवर्तन ल्याउने विश्वास लिइएको छ।