लेख विवरण

काठमाडौं, साउन ५, २०८१ — नेपाल प्रिमियर लिगमा सहभागी टोली लुम्बिनी लायन्सले सोमबार आफ्नाे नयाँ लोगो सार्वजनिक गरेको छ। केवल एक लोगो नभई नेपाली संस्कार, राष्ट्रिय गौरव र ऐतिहासिक सम्पदाको प्रतिनिधित्व गर्ने उद्देश्यसहित तयार गरिएको यस लोगोले लुम्बिनी लायन्सको पहिचानमा नयाँ ऊर्जा भरेको छ।

लोगो सार्वजनिक कार्यक्रममा बोल्दै लुम्बिनी लायन्सका अध्यक्ष ईश्वर बहादुर जीसीले भने, “यो लोगोले हाम्रो टिमको क्रिकेटमैदानको शक्ति मात्र होइन, लुम्बिनीको गौरवलाई पनि उजागर गर्छ। बुद्धको पवित्र भूमि लुम्बिनीबाट जन्मिएको यो टिम अब मैदानमा गर्जिनेछ र नेपाललाई विश्वमञ्चमा चिनाउनेछ।”

उनले थपे, “लुम्बिनी लायन्सले खेल, संस्कृति र राष्ट्रियता एउटै चिन्हमा जोडेर प्रस्तुत गरेका छन्।”

लोगोमा समेटिएका विशेष सांस्कृतिक र ऐतिहासिक तत्वहरू:

• मायादेवी मन्दिर — भगवान बुद्धको जन्मस्थल

• अशोक स्तम्भ — सम्राट अशोकद्वारा इसा पूर्व २४९ मा स्थापना गरिएको ऐतिहासिक चिन्ह

• रातो रङ, सूर्य र चन्द्रको चिन्ह — नेपाली झण्डाबाट प्रेरित, राष्ट्रियता र गौरवको प्रतीक

• सुनौलो अक्षर — लुम्बिनीमा निरन्तर जलिरहेको शान्ति दीपको प्रतिनिधित्व

२०२४ मा स्थापना भएको लुम्बिनी लायन्स टिमले नेपाल प्रिमियर लिगमार्फत नेपाली क्रिकेटमा नयाँ अध्याय सुरु गर्दैछ। नयाँ लोगोमार्फत टिमले न केवल राष्ट्रिय पहिचान बोक्ने लक्ष्य राखेको छ, तर शान्तिको सन्देश समेत विश्वभर फैलाउने अभिप्राय व्यक्त गरेको छ।

क्रिकेट र संस्कृतिको समन्वयको सन्देश बोकेको लुम्बिनी लायन्सको नयाँ लोगो नेपाली खेलकुदको इतिहासमा विशेष अध्यायको सुरुआतको संकेत हो।