लेख विवरण

काठमाडौं, साउन ३० –
महिला खेलकुदको क्षेत्रलाई प्रवर्द्धन गर्ने उद्देश्यसहित आयोजना हुँदै आएको भात्सल्य एभरेस्ट महिला भलिबल लिग (EWV) को दोस्रो संस्करण अब हिमालयन टिभी प्रिमियम HD मार्फत प्रत्यक्ष प्रसारण गरिने भएको छ।

सेप्टेम्बर ५ देखि १३ (भदौ १९–२७) सम्म आयोजना हुने यस प्रतिष्ठित लिगमा नेपालका चर्चित महिला भलिबल खेलाडीहरूसँगै विभिन्न देशबाट आएका १८ अन्तर्राष्ट्रिय खेलाडीहरू पनि सहभागी हुँदैछन्। प्रतियोगितामा छ वटा टिम सहभागी हुनेछन्, जसको मनोरञ्जन पक्षलाई अझ रोचक बनाउन विभिन्न चर्चित कलाकारहरू पनि सहभागी हुनेछन्।

यस सिजनको प्रसारण अधिकारका लागि हिमालयन टिभी प्रिमियम र आयोजक संस्था इन्फिनिटी ड्रिम्स प्रा.लि. बीच सुष्री मिडिया प्रा.लि. को माध्यमबाट औपचारिक सम्झौता गरिएको हो।

साझेदारीबारे प्रतिक्रिया:

सुष्री मिडिया प्रा.लि. का प्रबन्ध निर्देशक सुमन अधिकारीले भने:

"भात्सल्य एभरेस्ट महिला भलिबल लिग र हिमालयन टिभी प्रिमियम दुबईलाई यो सफल साझेदारीका लागि बधाई दिन चाहन्छौं। महिला खेलकुदप्रतिको उत्साह र लोकप्रियता बढ्दै गएको अवस्थामा यस्तो सहकार्य गर्वको विषय हो।"

हिमालयन टिभी प्रिमियमका महाप्रबन्धक गोविन्द ढकालले भने:

"एशियामै पहिलोपटक आयोजना हुँदै गरेको यो भात्सल्य एभरेस्ट महिला भलिबल लिगलाई प्रत्यक्ष प्रशारण गर्न पाउनु हाम्रो लागि गौरवको कुरा हो। महिला खेलकुदको विकास हाम्रो जिम्मेवारी पनि हो। नेपाल र विदेशबाट आएका खेलाडीहरूले यस लिग र च्यानलको प्रतिष्ठा बढाउने विश्वास लिएका छौं।"

अन्तर्राष्ट्रिय स्तरको उत्पादन

लिगको सम्पूर्ण खेल अन्तर्राष्ट्रिय स्तरको मापदण्डअनुसार उत्पादन गरिने आयोजकले जनाएको छ। यसबाट नेपाली भलिबल र विशेषगरी महिला खेलकुदको विकास र अन्तर्राष्ट्रिय पहिचानमा टेवा पुग्ने अपेक्षा गरिएको छ।

भात्सल्य एभरेस्ट महिला भलिबल लिग २०२५ को सम्पूर्ण रोमाञ्चक भिडन्त अब तपाईं हिमालयन टिभी प्रिमियम HD मा प्रत्यक्ष हेर्न सक्नुहुन्छ।