पहिलो टी-20 मा बंगलादेशको शानदार जीत, नेदरल्यान्ड ८ विकेटले पराजित
सिलहट, अगस्ट ३० – बंगलादेशले नेदरल्यान्डविरुद्धको पहिलो टी-20 अन्तर्राष्ट्रियमा सहज जित दर्ता गरेको छ। शनिबार सिलहट अन्तर्राष्ट्रिय स्टेडियममा भएको खेलमा पाहुना टोलीले ८ विकेट गुमाउँदै १३६ रन मात्र बनाउन सकेको थियो। बंगलादेशले लक्ष्य १३.३ ओभरमै २ विकेट गुमाएर पूरा गर्यो।
टस जितेर बलिङ रोजेको बंगलादेशका लागि तस्किन अहमदले घातक प्रदर्शन गर्दै २८ रनमा ४ विकेट लिए। त्यसैगरी सैफ हसनले २ विकेट झारे भने मुस्तफिजुर रहमानले १ विकेट लिए।
नेदरल्यान्डका लागि म्याक्स ओ’डाउडले २३, तेजा निदामनुरु २६ र टिम प्रिङ्गल १६ रन बनाए। अन्य ब्याटरहरू दोहोरो अंकमा पुगे पनि ठूलो साझेदारी हुन सकेन।
जवाफी ब्याटिङमा बंगलादेशका कप्तान लिटन दासले धमाकेदार ब्याटिङ गर्दै २९ बलमा ५४ रन बनाए। उनलाई सैफ हसन (३६*) ले साथ दिए। तन्जिद हसन तमीमले २९ रन जोडे भने परवेज हसन इमोन १५ रनमा आउट भए।
लक्ष्य पछ्याउने क्रममा बंगलादेशको दोस्रो विकेट ६६ रनमा खसे पनि लिटन–सैफ जोडीले खेल सकुशल समाप्त गर्दै टोलीलाई १४औँ ओभरमै जित दिलाए।
नेदरल्यान्डतर्फ टिम प्रिङ्गल र आर्यन दत्तले एक–एक विकेट हात पारे।
यस जितसँगै तीन खेलको सिरिजमा बंगलादेशले १–० को अग्रता लिएको छ। बाँकी दुई खेल क्रमशः सेप्टेम्बर १ र ३ मा हुनेछन्।
एशिया कपको तयारी स्वरूप बंगलादेशले यो सिरिज खेलिरहेको हो। यसैबीच पाकिस्तान र अफगानिस्तान यूएईमा ट्राई–सिरिज खेलिरहेका छन् भने श्रीलंका हाल जिम्बाब्वे भ्रमणमा छ। भारतले भने हाल कुनै अन्तर्राष्ट्रिय खेल खेलिरहेको छैन।
टिप्पणी लेख्नुहोस्