लेख विवरण

काठमाडौँ, भदौ १९ — अखिल नेपाल फुटबल संघ (एन्फा)ले यही २०८२ सालको पौष ९ गतेबाट सुरु हुने प्रस्तावित शहीद स्मारक ए डिभिजन लिग उपत्यकाबाहिर सञ्चालन गर्ने तयारीलाई लिएर आज एन्फा कम्प्लेक्स, सातदोबाटोमा महत्वपूर्ण बैठक सम्पन्न गरेको छ।

बैठकमा लिग सञ्चालनका लागि प्रस्तावित जिल्लाका अध्यक्षहरू, जिल्ला पदाधिकारीहरू, र सम्बन्धित स्थानका केन्द्रीय सदस्यहरू सहभागी थिए।

एन्फाका महासचिव किरण राईले बैठकमा क्लबहरूसँग हालसम्म भएको छलफलका बारेमा जानकारी गराउँदै, ए डिभिजन लिगलाई उपत्यकाबाहिर पुर्‍याई डबल राउन्ड रोबिन ढाँचामा सञ्चालन गर्ने योजना स्पष्ट पारे।

बैठकमा लिग सञ्चालनका लागि आवश्यक तयारीबारे गहन छलफल भएको थियो। छलफलका मुख्य विषयहरूमा निम्न पक्षहरू समेटिएका थिए:

• खेल मैदानको अवस्था र सुधार योजना

• पूर्वाधार निर्माण तथा मर्मत

• सुरक्षा तथा दर्शक व्यवस्थापन

• मार्केटिङ्ग रणनीति

• प्राविधिक पक्षहरूको व्यवस्थापन

बैठकमा सहभागी जिल्ला अध्यक्षहरूले आफ्ना-आफ्ना जिल्लामा रहेका मैदानहरूको वर्तमान अवस्था, त्यहाँका चुनौतीहरू र सम्भावित समाधान उपायहरू प्रस्तुत गरे। एन्फाले तिनीहरूको सुझाव संकलन गर्दै लिगलाई व्यवस्थित, प्रतिस्पर्धात्मक र दर्शकमैत्री बनाउन आवश्यक रणनीति तयार गर्ने जनाएको छ।

यस बैठकले एन्फाको रणनीतिक योजना अनुसार फुटबल विकासलाई विकेन्द्रीकरण गर्दै मुलुकभर फैलाउने उद्देश्यलाई सघाउने विश्वास व्यक्त गरिएको छ।