लेख विवरण

चितवन, भदौ २७ – नेपाली क्रिकेट फ्रेन्चाइज टोली चितवन राइनोजले नेपालको पहिलो महिला प्रधानमन्त्री सम्माननीय सुशीला कार्कीलाई बधाई ज्ञापन गर्दै उनको कार्यकाल सफल रहोस् भन्ने शुभकामना व्यक्त गरेको छ।

क्लबले सार्वजनिक गरेको सन्देशमा भनिएको छ: "इतिहास रच्दै नेपालको पहिलो महिला प्रधानमन्त्रीजस्तो गरिमामय पदमा नियुक्त हुनुभएको पूर्वप्रधानन्यायाधीश सुशीला कार्कीज्यूलाई हार्दिक बधाई, तथा आगामी कार्यकाल सफल र प्रेरणादायी रहोस् भन्ने शुभकामना।"

सुशीला कार्कीको प्रधानमन्त्री पदमा नियुक्तिलाई चितवन राइनोजले महिला सशक्तिकरण र समावेशी नेतृत्वको महत्वपूर्ण उपलब्धिका रूपमा लिएको छ। क्लबले उनको नेतृत्वमा देशले सामाजिक, आर्थिक र नीतिगत सुधारमा उल्लेखनीय प्रगति गर्ने विश्वास व्यक्त गरेको छ।

पूर्वप्रधानन्यायाधीशको रूपमा सुशीला कार्कीले न्याय क्षेत्रमा स्थापित गरेको छवि अब कार्यकारी नेतृत्वमा पनि उदाहरणीय हुने अपेक्षा गरिएको छ।