लेख विवरण

काठमाडौँ: भारत र पाकिस्तानबीचको गहिरो राष्ट्रिय प्रतिद्वन्द्विताबीच क्रिकेटले दुई देशलाई जोड्ने पुलको काम गर्दै आएको थियो। तर, हालै एसिया कपमा भएको खेलले यो कुटनीतिको अवसान भएको संकेत दिएको छ। खेलपछि भारतीय टोलीले पाकिस्तानी खेलाडीसँग परम्परागत रुपमा गरिने हात मिलाउन अस्वीकार गरेपछि दुई देशबीचको राजनीतिक तनाव क्रिकेट मैदानमा समेत देखिएको छ। 

 

पछिल्लोपटक कश्मीरको पहलगाममा भएको आतंकवादी आक्रमणमा २६ जनाको ज्यान गएपछि यो घटनाले दुई देशबीचको सम्बन्धमा थप तिक्तता ल्याएको हो। भारतले उक्त आक्रमणको आरोप पाकिस्तानलाई लगाएपछि मे महिनामा दुई देशबीच तनाव बढेको थियो। 

 

भारतीय कप्तान सूर्यकुमार यादवले हात नमिलाउने निर्णय ‘टिमको सामुहिक निर्णय’ भएको बताए। उनले भने, “हामी केवल खेल्न आएका थियौँ। केही कुरा खेलभावनाभन्दा माथि हुन्छन्। हामी यो जित ‘अपरेसन सिन्दूर’मा भाग लिने हाम्रा सेना र पहलगाम आक्रमणका पीडित परिवारलाई समर्पित गर्छौं।” 

 

भारतको यस कार्यप्रति पाकिस्तानमा तीव्र आक्रोश व्यक्त भएको छ। पाकिस्तानले अन्तर्राष्ट्रिय क्रिकेट परिषद् (आईसीसी) मा औपचारिक उजुरी दर्ता गरेको थियो, यद्यपि आईसीसीले भारतीय कप्तानलाई कुनै कारबाही गर्न अस्वीकार गर्‍यो। पाकिस्तान क्रिकेट बोर्डका अध्यक्ष मोहसिन नक्वीले खेल भावनाको अभावले आफू निराश भएको बताए।

 

यसपछि, पाकिस्तानले बाँकी प्रतियोगिता बहिष्कार गर्ने धम्की दिएपछि खेल रेफ्री एन्डी पाइक्रफ्टले पाकिस्तानका कप्तान सलमान अली आगासँग माफी मागे। उनले उक्त घटनालाई ‘गलतफहमी’ भन्दै विवाद साम्य पार्ने प्रयास गरेका छन्। दुवै टोलीले सुपर-४ चरणमा प्रवेश गरेपछि यस आइतबार फेरि आमनेसामने हुनेछन्। 

 

विश्लेषकहरूका अनुसार यो घटनाले ‘क्रिकेट कुटनीति’को अन्त्य भएको संकेत गर्छ। दुई देशका कट्टरपन्थी शासनहरूका कारण क्रिकेट मैदान अब राष्ट्रियता प्रदर्शन गर्ने थलो बनेको र पुरानो मित्रतापूर्ण सम्बन्ध तत्काल फर्कने सम्भावना नरहेको उनीहरूको भनाइ छ।