आईसीसीले अमेरिका क्रिकेटलाई निलम्बन गर्यो
काठमाडौं, असोज ८ ।
अन्तर्राष्ट्रिय क्रिकेट परिषद् (आईसीसी) ले अमेरिकन क्रिकेट (यूएसए क्रिकेट) लाई आफ्नो सदस्यता स्थिति तत्काल प्रभावबाट निलम्बन गर्ने निर्णय गरेको छ ।
गत एक वर्षदेखि भइरहेका समीक्षा र सरोकारवालासँगको छलफलपछि आईसीसी बोर्डले गरेको निर्णयअनुसार यूएसए क्रिकेटले सदस्य राष्ट्रको दायित्व पूरा नगरेको, शासन संरचना कार्यान्वयनमा असफल भएको, अमेरिकाको ओलम्पिक तथा पेरालिम्पिक समिति (USOPC) बाट मान्यता पाउन प्रगति नगरेको तथा क्रिकेटको विश्वव्यापी छविमा नकारात्मक असर पारेको ठहर गरिएको छ ।
आईसीसीले भनेको छ, "यो निर्णय दुर्भाग्यपूर्ण भए पनि खेलको दीर्घकालीन हितका लागि आवश्यक थियो। तर यस निलम्बनले खेलाडी र खेललाई असर नपार्ने सुनिश्चित गर्न आईसीसी प्रतिबद्ध छ।"
निलम्बनपछि पनि यूएसएका राष्ट्रिय टिमहरूले आईसीसीका प्रतियोगितामा सहभागी हुने अधिकार कायम राख्नेछन् । यसैअन्तर्गत २०२८ मा अमेरिकाको लस एन्जेलसमा हुने ओलम्पिक खेलको तयारी समेत प्रभावित नहुने बताइएको छ ।
हालका लागि अमेरिकी टिमहरूको व्यवस्थापन र प्रशासन आईसीसी वा यसले तोकेका प्रतिनिधिले गर्नेछन् । आईसीसीले यसरी खेलाडीहरूको हित सुरक्षित गर्ने र उच्चस्तरीय तालिम तथा खेलाडी विकास कार्यक्रमलाई निरन्तरता दिने जनाएको छ ।
आईसीसी नर्मलाइजेशन कमिटीले यूएसए क्रिकेटको निलम्बन हटाउनुपर्ने शर्तहरू तय गर्नेछ, जसमा संस्थागत शासन संरचना, सञ्चालन प्रणाली र क्रिकेटको अन्तर्राष्ट्रिय संरचनामा यसको भूमिकासम्बन्धी सुधार समावेश हुनेछन् ।
आईसीसीले क्रिकेटलाई अमेरिकामा प्रवर्द्धन गर्ने, खेलाडीहरूको हित सुरक्षित गर्ने र ओलम्पिक सहभागितासहित विश्व क्रिकेटमा महत्वपूर्ण भूमिका दिलाउन निरन्तर सहयोग गर्ने प्रतिबद्धता जनाएको छ ।
टिप्पणी लेख्नुहोस्