लेख विवरण

काठमाडौंँ।नेपालका दुई प्रतिभावान युवा चेस खेलाडी सिएम पुरुषोत्तम सिलवाल (U-18) र एआइएम अभीक शाह (U-16) अल्बानियाको डुरेसमा हुने फिडे वर्ल्ड युथ चेस च्याम्पियनशिप २०२५ मा सहभागी हुन प्रस्थान गरेका छन्।

अक्टोबर ३ देखि १६ सम्म सञ्चालन हुने यो प्रतिष्ठित प्रतियोगितामा ८० राष्ट्रका ७२० खेलाडीबीच ११ चरणको स्विस प्रणाली अनुसार प्रतिस्पर्धा हुनेछ।

सिएम पुरुषोत्तम सिलवाल (FIDE 2129) ले U-18 समूहमा २२९ औं वरियताबाट प्रतिस्पर्धा गर्ने छन् भने एआइएम अभीक शाह (FIDE 1928) ले U-16 समूहमा ४२५ औं वरियताबाट खेल्नेछन्।

खेलको नियमअनुसार पहिलो ४० चालका लागि ९० मिनेट, त्यसपछि ३० मिनेट थप समय रहनेछ र हरेक चालमा ३० सेकेन्डको इन्क्रिमेन्ट दिइनेछ।

प्रतियोगिता फिडे र अल्बानिया चेस महासंघको संयुक्त आयोजनामा हुनेछ। प्रस्थानको अवसरमा नेपाल बुद्धिचाल महासंघका अध्यक्ष हिराकाजी महर्जनसहित पदाधिकारी तथा अभिभावकहरूले खेलाडीलाई शुभकामना सहित विदाई गरेका थिए।