लेख विवरण

काठमाडौंँ। अन्तर्राष्ट्रिय ओलम्पिक समिति (IOC) र वर्ल्ड ओलिम्पियन्स एसोसिएशन (WOA) ले ओलिम्पियनहरूको हितमा आपसी सहकार्यलाई थप सुदृढ गर्ने भएका छन्। यी दुई संस्थाले नयाँ सहयोग तथा इजाजतपत्र सम्झौता (Cooperation and Licence Agreement) मा हस्ताक्षर गर्दै आफ्नो दीर्घकालीन साझेदारीलाई नवीकरण गरेका हुन्।

यो सम्झौता ओलिम्पियनहरूका लागि निरन्तर समर्थन र सशक्तीकरणमा केन्द्रित हुनेछ। यसको उद्देश्यहरूमा ओलिम्पियनहरूसँगको संलग्नता सुदृढ बनाउने, दुवै संस्थाबीचको सहकार्य बलियो बनाउने, र साझेदारीमा सुशासनलाई प्रवर्द्धन गर्ने रहेका छन्।

नयाँ सम्झौताले संयुक्त पहल र स्रोतहरूको प्रभावकारी उपयोगमा जोड दिनेछ, जसबाट ओलिम्पियनहरूले ओलम्पिक आन्दोलनका आदर्श र मूल्यहरूलाई निरन्तर प्रवर्द्धन गर्न सक्नेछन्।

IOC की अध्यक्ष तथा दुई पटककी ओलिम्पिक च्याम्पियन कर्स्टी कोभेन्ट्री ले भनिन्, “हामी ओलिम्पियनहरूका रूपमा जीवनभर ओलम्पिक आन्दोलनका मूल्य र अनुभवसँग जोडिएका छौं। WOA सँगको यो नयाँ सम्झौताले ओलिम्पियनहरूलाई खेलजीवन मात्र होइन, जीवनभरका लागि सशक्त बनाउन हाम्रो प्रतिबद्धतालाई अझ गहिरो बनाएको छ। हामी संयुक्त रूपमा उनीहरूलाई आदर्श व्यक्तित्व, समुदायका नेता र ओलम्पिक आदर्शका दूतका रूपमा समर्थन गर्न निरन्तर प्रतिबद्ध छौं।”

त्यसैगरी, WOA का अध्यक्ष तथा ओलिम्पिक कांस्य पदक विजेता जोएल बोजु (OLY) ले भने, “IOC सँगको हाम्रो सम्बन्ध अझ बलियो हुँदै जानुमा हामी अत्यन्त उत्साहित छौं। यसले हामीलाई हाम्रा राष्ट्रिय संघ र व्यक्तिगत ओलिम्पियनहरूको आवश्यकताहरू पूरा गर्न थप स्रोत र सहयोगका माध्यमबाट प्रभावकारी सेवा गर्न सक्षम बनाउनेछ। पछिल्ला तीन ओलम्पिक चक्रहरूमा हामीले OLY पदवीको स्थापना, अनुदान तथा छात्रवृत्ति कार्यक्रमहरूजस्ता महत्वपूर्ण उपलब्धि हासिल गरेका छौं, र हामी भविष्यमा पनि IOC सँग हातेमालो गर्दै ओलिम्पियनहरूका लागि नयाँ अवसरहरू सिर्जना गर्न उत्सुक छौं।”

यो नयाँ सम्झौता ओलम्पिक समुदायका लागि दीर्घकालीन प्रभाव पार्ने अपेक्षा गरिएको छ, जसले विश्वभरका ओलिम्पियनहरूलाई अझ सशक्त, प्रेरित र प्रभावशाली बनाउनेछ।