लेख विवरण

लन्डन, कात्तिक २ गते —
इङ्लिस प्रिमियर लिग (EPL) मा चेल्सीले नटिङ्घम फरेस्टलाई ३–० ले पराजित गर्दै सिजनको प्रभावशाली प्रदर्शन जारी राखेको छ। शनिबार राति भएको खेलमा जितसँगै चेल्सीले आठ खेलबाट १४ अंक जोड्दै लिग तालिकाको चौथो स्थानमा उक्लिएको छ।

संघर्षरत नटिङ्घम फरेस्ट भने पाँच अंकसहित १७औं स्थानमा झरेको छ। प्रशिक्षक एनन्गे पोस्टेकोग्लुको नियुक्तिपछि नटिङ्घमले लगातार आठ खेलमा पनि जित हात पार्न सकेको छैन।

चेल्सीका युवा आचेम्पोङको पहिलो गोल

चेल्सीका लागि १९ वर्षीय जोस आचेम्पोङ, पेड्रो नेटो, र रिस जेम्सले गोल गरे। नौ वर्षको उमेरमा चेल्सी एकेडेमीमा भर्ना भएका आचेम्पोङका लागि यो सिनियर टोलीमा पहिलो गोल हो।

खेलको ८७औं मिनेटमा चेल्सीका मालो गुस्टोले दोहोरो पहेंलो कार्ड पाएपछि मैदान छोड्नुपरेको थियो।

कोल पाल्मर चोटका कारण बाहिर

चेल्सीका प्लेमेकर कोल पाल्मर अझै पनि चोटमुक्त भएका छैनन्। गत महिना म्यान्चेस्टर युनाइटेडविरुद्धको खेलमा घाइते भएका पाल्मर कम्तीमा छ हप्ता मैदानबाहिर रहने बताइएको छ।

ला लिगामा इस्पानियोलको ऐतिहासिक जित

यसैबीच, स्पेनी ला लिगामा इस्पानियोलले ओभिएडोलाई २–० ले पराजित गरेको छ। बार्सिलोना सहरको क्लब इस्पानियोलले अन्तिम समयमा दुई गोल गर्दै जित हात पारेको हो।

इस्पानियोलका लागि किके गार्सिया र पेरे मिलाले गोल गरेका थिए। यो जितसँगै इस्पानियोल अंक तालिकाको पाँचौं स्थानमा पुगेको छ।
सन् १९९५ पछि पहिलोपटक इस्पानियोलले ओभिएडोको मैदानमा जित हासिल गरेको हो।