लेख विवरण

पोर्चुगल, कात्तिक २५ गते । विश्व फुटबलका महान स्ट्राइकरमध्ये एक क्रिस्टियानो रोनाल्डोले सन् २०२६ मा हुने विश्वकप आफ्नो अन्तिम हुने घोषणा गरेका छन्। ४० वर्षीय रोनाल्डोले अब दुई वर्षभित्र सक्रिय खेल जीवनलाई अन्त्य गर्ने संकेत दिएका हुन्।

साउदी अरबमा आयोजित एक अन्तर्राष्ट्रिय फोरमसँग भिडियो संवाद गर्दै रोनाल्डोले भने, “यो निश्चित छ — २०२६ मेरो अन्तिम विश्वकप हुनेछ। म ४१ वर्षको हुनेछु र त्यो नै अन्तर्राष्ट्रिय स्तरमा बिदा लिन उचित समय हुनेछ।”

रोनाल्डो अहिले साउदी प्रो लिग अन्तर्गत अल नासर क्लबका लागि खेलिरहेका छन्। उनले सन् २०२३ मा क्लबसँग आफ्नो यात्रा सुरु गरेका थिए र हालसम्म पनि उत्कृष्ट प्रदर्शन गरिरहेका छन्। गत हप्ता पनि उनले “अब एक वा दुई वर्ष मात्रै खेलमा रहनेछु” भन्दै करियरको अन्त्य नजिक आइरहेको संकेत दिएका थिए।

पाँच पटकका बालोन डि’ओर विजेता रोनाल्डोले २००६ देखि लगातार पाँच विश्वकपमा सहभागिता जनाइसकेका छन्। उनले छैटौँ पटक विश्वकप खेल्ने लक्ष्य राखेका छन्। पोर्चुगलले हालसम्म सन् २०२६ को विश्वकपका लागि छनोट सुनिश्चित गर्न बाँकी छ, तर आयरल्यान्डविरुद्धको खेलमा जित निकाले देशले आफ्नो स्थान पक्का गर्नेछ।

रोनाल्डोले २०२२ को अन्त्यतिर म्यानचेस्टर युनाइटेड छोडेर साउदी क्लब अल नासरमा प्रवेश गरेका थिए। उनको आगमनपछि साउदी अरब विश्वका शीर्ष खेलाडीहरूको नयाँ गन्तव्य बन्न पुगेको छ।

यता साउदी अरबले पनि खेलकुदमा ठूलो लगानी गर्दै सन् २०३४ को विश्वकप आयोजनाको अधिकार प्राप्त गरिसकेको छ, जसले मध्यपूर्वमा फुटबलको लोकप्रियता अझ बढाउने अपेक्षा गरिएको छ।