लेख विवरण

क्विटो, पुस ३ गते । इक्वेडरका चर्चित फुटबलर तथा राष्ट्रिय टोलीका पूर्व सदस्य मारियो पिनिडाको बन्दरगाह सहर ग्वायाकिलमा गोली प्रहार गरी हत्या गरिएको छ। उहाँ आबद्ध क्लबले बुधबार घटनाको पुष्टि गरेको हो।

लागुऔषध तस्करीसँग जोडिएका आपराधिक समूहको प्रभाव बढ्दै गएको ग्वायाकिलमा पछिल्ला वर्षहरूमा हिंसात्मक घटना तीव्र बन्दै गएका छन्। यही असुरक्षित वातावरणबीच पिनिडा आक्रमणको शिकार बन्नुभएको हो। हालका महिनाहरूमा इक्वेडरका थुप्रै व्यावसायिक फुटबल खेलाडीहरू हिंसात्मक घटनाको निशानामा परेका छन्।

३३ वर्षीय पिनिडाले सन् २०१८ र २०२२ को विश्वकप छनोट चरणमा इक्वेडरको राष्ट्रिय टोलीबाट प्रतिनिधित्व गर्नुभएको थियो। यद्यपि कतारमा सम्पन्न सन् २०२२ को विश्वकपको अन्तिम चरणमा भने उहाँ टोलीमा समावेश हुन सक्नुभएको थिएन। क्लब फुटबलतर्फ उहाँले ब्राजिलको प्रसिद्ध क्लब फ्लुमिनेन्सेबाट समेत व्यावसायिक खेल खेल्नुभएको थियो।

उहाँको क्लब बार्सिलोना एससीले सामाजिक सञ्जालमार्फत शोक व्यक्त गर्दै पिनिडाको निधनप्रति गहिरो दुःख प्रकट गरेको छ। क्लबले घटनाको निन्दा गर्दै पीडित परिवारप्रति समवेदना व्यक्त गरेको छ र दोषीलाई कानुनी दायरामा ल्याउन माग गरेको छ।

पिनिडाको मृत्युको पुष्टि इक्वेडरको गृह मन्त्रालयले पनि गरेको छ। मन्त्रालयका अनुसार घटनापछि विशेष प्रहरी टोली परिचालन गरी अनुसन्धान अघि बढाइएको छ। आक्रमणमा संलग्न व्यक्तिहरूको पहिचान र पक्राउका लागि सुरक्षा निकाय सक्रिय रूपमा परिचालित छन्।

स्थानीय डिजिटल समाचार माध्यमका अनुसार मोटरसाइकलमा आएका दुई जना आक्रमणकारीले पिनिडामाथि गोली प्रहार गरेका थिए। सो क्रममा उहाँकी आमा र अर्को एक महिलामाथि पनि गोली चलाइएको बताइएको छ। घटनामा घाइतेहरूको अवस्थाबारे भने विस्तृत विवरण सार्वजनिक गरिएको छैन।

यसअघि सेप्टेम्बरमा इक्वेडरको दोस्रो डिभिजनका तीन फुटबल खेलाडीको हत्या भएको थियो। तीमध्ये एक घटनालाई खेलकुद सट्टेबाजीसँग जोडेर हेरिएको थियो। त्यसको केही समयपछि स्थानीय खेलाडी ब्रायन एङ्गुला पनि गोली प्रहारमा घाइते हुनुभएको थियो।

कुनै समय ल्याटिन अमेरिकाकै सुरक्षित देशका रूपमा चिनिएको इक्वेडर पछिल्ला वर्षमा गम्भीर सुरक्षा चुनौतीको सामना गरिरहेको छ। कोलम्बिया र पेरुजस्ता कोकेन उत्पादक राष्ट्र र अन्तर्राष्ट्रिय बजारबीचको प्रमुख मार्ग बनेपछि लागुऔषध तस्करीसँग सम्बन्धित गिरोहहरूको गतिविधि तीव्र बनेको छ।

विशेषगरी ग्वायाकिलमा कार बम विस्फोट, गोलीकाण्ड र फिरौतीका घटना बढ्दै गएका छन्। सरकारी तथ्याङ्कअनुसार यस वर्ष जनवरीदेखि सेप्टेम्बरसम्म मात्र ग्वायाकिलमा करिब १,९०० हत्या दर्ता भएका छन्। बढ्दो हिंसाले खेलकुद क्षेत्र मात्र नभई देशको सामाजिक सुरक्षामाथि समेत गम्भीर चुनौती खडा गरेको छ।