लेख विवरण

काठमाडौँ । इन्डियन प्रिमियर लिग (IPL) २०२६ अन्तर्गत दिल्ली क्यापिटल्स र चेन्नई सुपर किंग्सबीचको खेलमा दिल्लीका ब्याटर नितिश राणाको विकेटलाई लिएर नयाँ विवाद सिर्जना भएको छ। अरुण जेटली स्टेडियममा भएको खेलमा राणा आउट भएको तरिकालाई लिएर सामाजिक सञ्जालमा बहस सुरु भएको हो।

के भएको थियो घटना?

चेन्नईका स्पिनर नुर अहमदको बलमा नितिश राणाले स्वीप सट खेल्ने प्रयास गरेका थिए। बल हावामा उड्यो र डीप फाइन लेगमा रहेका फिल्डरले क्याच समाते। मैदानमा रहेका अम्पायरले उनलाई आउट दिए। तर, खेलपछि सामाजिक सञ्जालमा एउटा भिडियो भाइरल भयो, जसमा दाबी गरिएको छ कि बल राणाको ब्याटमा लाग्नुभन्दा पहिले नै स्टम्पको बेल्स झरिसकेको थियो।

यसपछि फ्यानहरूले प्रश्न उठाएका छन्– के अम्पायरले यसलाई ‘डेड बल’ घोषित गर्नुपर्थ्यो?

हिट विकेट कि विकेटकिपरको गल्ती?

सामाजिक सञ्जालमा कतिपयले राणा 'हिट विकेट' भएको वा विकेटकिपर सन्जु स्यामसनको हात लागेर बेल्स झरेको आशंका पनि गरेका थिए। तर, फुटेजमा राणा वा स्यामसन कसैको पनि सम्पर्कबाट बेल्स झरेको देखिँदैन। दिल्लीमा चलिरहेको तीव्र हावाका कारण बेल्स आफैँ झरेको अनुमान गरिएको छ।

क्रिकेटको नियम के भन्छ?

एमसीसीको नियम २० अनुसार, यदि ब्याटरले बल खेल्ने तयारी गरिरहँदा कुनै आवाज, हलचल वा अवरोधका कारण विचलित हुन्छ भने अम्पायरले त्यसलाई ‘डेड बल’ दिन सक्छन्। नियम २०.४.२.६ मा उल्लेख भएअनुसार, स्ट्राइकर विचलित भएको अवस्थामा मात्रै डेड बलको संकेत दिइन्छ।

तर, नितिश राणाको हकमा उनले बल खेलिसकेका थिए र सट पनि पुरा गरेका थिए। बेल्स झरे पनि उनले सट प्रहार गरिसकेको र उनी विचलित भएको नदेखिएकोले अम्पायरले त्यसलाई डेड बल दिएनन्।

आउट सही कि गलत?

नियमत: बल फ्याँकिसकेपछि र ब्याटर विचलित नभएको अवस्थामा बेल्स झरेकै आधारमा डेड बल दिनुपर्ने स्पष्ट आधार हुँदैन। त्यसैले अम्पायरको निर्णयलाई प्राविधिक रूपमा सही मानिएको छ। यद्यपि, भिडियो भाइरल भएपछि आइपिएलका फ्यानहरू भने दुई धारमा बाँडिएका छन्। कसैले यसलाई अम्पायरको कमजोरी भनेका छन् भने कसैले नियम अनुसार निर्णय सही भएको तर्क गरेका छन्।

यो विवादले आइपिएल २०२६ मा प्रविधि र नियमको व्याख्यामा पुन: बहस छेडिदिएको छ।