लेख विवरण

काठमाडौँ । सामाजिक सञ्जाल इन्स्टाग्रामले नक्कली अकाउन्ट (फेक अकाउन्ट) र बोट्सविरुद्ध ठूलो कारबाही सुरु गरेपछि विश्वका चर्चित खेल तथा मनोरञ्जन क्षेत्रका हस्तीहरूको फलोअर्स संख्यामा भारी गिरावट आएको छ।

इन्स्टाग्रामले आफ्नो प्लेटफर्मलाई सुरक्षित र वास्तविक बनाउने अभियान अन्तर्गत नक्कली अकाउन्टहरू हटाउन थालेपछि क्रिस्टियानो रोनाल्डो, लियोनल मेसी र विराट कोहली जस्ता दिग्गज स्टारहरूका लाखौँ फलोअर्स घटेका छन्।

कोहली र रोनाल्डोलाई कति घाटा ?

विश्व क्रिकेटका आइकन विराट कोहलीको इन्स्टाग्राम फलोअर्समा ठूलो गिरावट देखिएको छ। केही समयअघि २७.६ करोडभन्दा बढी फलोअर्स रहेका कोहलीको संख्या घटेर अहिले २७.३ करोडको हाराहारीमा पुगेको छ। अर्थात्, उनले करिब २० लाखभन्दा बढी फलोअर्स गुमाएका छन्।

त्यस्तै, फुटबलका सुपरस्टार क्रिस्टियानो रोनाल्डोको अवस्था पनि उस्तै छ। ६७.३ करोड फलोअर्स रहेका रोनाल्डोको संख्या घटेर ६६.४ करोड पुगेको छ। उनले करिब ७० लाख फलोअर्स गुमाएका छन्। अर्का फुटबल स्टार लियोनल मेसीको फलोअर्स संख्या ५१.२ करोडबाट घटेर ५०.७ करोडमा झरेको छ।

मनोरञ्जन क्षेत्रमा पनि असर

खेल जगतमा मात्र नभई हलिउड र बलिउडका कलाकारहरू पनि यसबाट अछुतो रहेनन्। प्रियंका चोपडा, काइली जेनर र एलेन डिजेनेरेस जस्ता सेलिब्रेटीहरूको फलोअर्स पनि लाखौँको संख्यामा घटेको छ। एक अध्ययनका अनुसार कतिपय सेलिब्रेटीहरूको अकाउन्टमा ५० प्रतिशतसम्म नक्कली फलोअर्स रहेको दाबी गरिएको छ।

किन घटाइयो फलोअर्स ?

इन्स्टाग्रामले समय-समयमा निष्क्रिय रहेका, मेसिनद्वारा सञ्चालित (बोट्स) र विज्ञापनका लागि मात्र खोलिएका नक्कली अकाउन्टहरू डिलिट गर्ने गर्दछ। धेरैजसो अवस्थामा ब्रान्ड भ्यालु बढाउन र स्पन्सरसिप पाउनका लागि नक्कली फलोअर्स किन्ने गरिन्छ। तर इन्स्टाग्रामको यो पछिल्लो 'सफाई अभियान'ले कसको कति वास्तविक फ्यानबेस छ भन्ने कुराको बहस पुनः सुरु गरिदिएको छ।

के यसले स्टारडममा असर पार्छ ?

विज्ञहरूका अनुसार फलोअर्सको संख्या घट्दा सेलिब्रेटीहरूको डिजिटल ब्रान्ड भ्यालु र व्यावसायिक सम्झौतामा केही असर पर्न सक्छ। यद्यपि, विराट कोहली र रोनाल्डो जस्ता खेलाडीहरूको लोकप्रियता उनीहरूको मैदानको प्रदर्शन र फ्यानहरूसँगको भावनात्मक सम्बन्धमा आधारित भएकाले यसले उनीहरूको वास्तविक साखमा भने ठूलो असर नपर्ने देखिन्छ।

यो कारबाहीपछि सामाजिक सञ्जालमा देखिने लोकप्रियता कति वास्तविक र कति कृत्रिम हुन्छ भन्ने विषयमा अहिले विश्वभर चर्चा सुरु भएको छ।