एसियन गेम्स क्रिकेटमा एसियाका शीर्ष चार टोलीले सोझै क्वाटरफाइनल खेल्ने, यस्तो छ तालिका
काठमाडौंँ । एसियन गेम्स क्रिकेटमा आइसिसी वरियतामा रहेका शीर्ष चार टोलीले सोझै क्वाटरफाइनल खेल्ने भएका छन् । एसियन ओलम्पिक कमिटीको नियमअनुसार वरियतामा एसियाका शीर्ष चार महिला र पुरुष टोलीले सीधै क्वाटरफाइनल प्रवेश पाउनेछन् ।
एसियन गेम्स सेप्टेम्बर २३ देखि अक्टोबर ८ सम्म चीनको हाङझोउमा आयोजना हुनेछ । प्रतियोगिताका खेलहरु झेजियाङ युनिभर्सिटी अफ टेक्नोलोजीको पिङफेङ क्रिकेट मैदानमा हुनेछ । प्रतियोगितामा महिलातर्फ १४ र पुरुषतर्फ १८ टोलीको सहभागिता रहनेछ । प्रतियोगिताका खेलहरु टी–२० फर्म्याटमा खेलाइनेछ र एक दिनमा दुई खेल हुनेछन् । पहिलो खेल बिहान ९ः३० र दोस्रो खेल दिउँसो २ः३० बजेदेखि सुरु हुनेछ ।
एसियन ओलम्पिक कमिटीका अनुसार सन् २०२३ को जुन १ सम्म आइसिसी वरियतामा रहेका एसियाका शीर्ष चार टोलीले सिधै क्वाटरफाइनलमा प्रवेश पाउनेछन् । यही समय सीमा अनुसार बाँकी टोलीको वरियता र खेलको पनि टुङ्गो लाग्नेछ ।
प्रतियोगितामा महिलातर्फ एसियाका शीर्ष चार टोलीले क्वाटरफाइनल खेल्नेछन् । बाँकी १० टोलीले क्वालिफायर राउण्ड खेल्नेछन् । क्वालिफायर राउण्डका ६ खेलहरु सेप्टेम्बर १९ देखि २१ सम्म हुनेछन् । सेप्टेम्बर २२ र २४ मा ४ क्वाटरफाइनल खेल हुनेछ । आइसिसी टी–२० वरियतामा भारत, पाकिस्तान, श्रीलङ्का र बङ्गलादेश एसियाको शीर्ष चारमा रहेकाले उनीहरूले सिधै क्वाटरफाइनल खेल्नेछन् ।
एसियन गेम्सको उदघाटन सेप्टेम्बर २३ मा हुने भएकोले यस दिन कुनै पनि क्रिकेट खेल हुने छैन । क्वाटरफाइनलपछि सेप्टेम्बर २५ मा दुई सेमिफाइनल र २६ मा फाइनल खेल हुनेछ । फाइनलको दिन तेस्रो स्थानका लागि पनि खेल हुनेछ । प्रतियोगितामा महिलातर्फ कुल १४ खेल हुनेछन् ।
महिला क्रिकेट प्रतियोगिता सकिएपछि पुरुषतर्फका खेलहरु सेप्टेम्बर २८ देखि सुरु हुनेछ । जसमा एसियाका शीर्ष ४ टोलीले सिधै क्वाटरफाइनल खेल्नेछन् । बाँकी १४ मध्ये ४ टोली क्वालिफायर चरणबाट क्वाटरफाइनलमा पुग्नेछन् । क्वालिफायर चरणका १० खेल अक्टोबर २ सम्म हुनेछन् भने अक्टोबर ३ मा रेस्ट डे हुनेछ ।
प्रतियोगितामा अक्टोबर ४ र ५ का दिन क्वाटरफाइनल खेल हुनेछ । सेमिफाइनल अक्टोबर ६ मा र फाइनल अक्टोबर ७ मा खेलाइनेछ । फाइनलअघि तेस्रो स्थानका लागि खेल हुनेछ । यसरी पुरुषतर्फ कुल १८ खेल हुनेछन् ।
भारत, पाकिस्तान, श्रीलङ्का र बङ्गलादेश एसियाका शीर्ष चार टोली हुन् । त्यसैले यी टिमले पनि सिधै क्वाटरफाइनल खेल्नेछन् भने नेपाल, अफगानिस्तान, युएई, हङकङ र चीनजस्ता टोलीले क्वालिफायर चरण खेल्नुपर्नेछ ।
थप समाचार :
एसीसी इमर्जिङ एसिया कप : नेपालले सोमबार भारतको सामना गर्दै
स्की सङ्घमा श्रेष्ठकै निरन्तरता
दोस्रो मैत्रीपूर्ण खेलमा नेपालले बङ्गलादेशलाई हरायो
डेभिड बेकह्यामको क्लब मियामीमा अनुबन्धित भए मेस्सी
एनआरएस स्पोर्टस फाउन्डेसनद्धारा धावकहरुका लागि प्रशिक्षण सन्चालन
टिप्पणी लेख्नुहोस्